12 красавіка а 18.00 адбудзецца творчая сустрэча з аўтарам выставы фатаграфій «Беларусь у абдымках зорак» - Віктарам Малышчыцам. Для маладога фатографа і астранома Віктара Малышчыца, аўтара роліка «Беларусь: у абдымках зорак», які сваім з'яўленнем «ўзарваў» прастору байнэта (толькі за першыя два дні яго работу паглядзела каля 40 тысяч чалавек), адна з мэтаў у жыцці – гэта паказаць людзям прыгажосць нашай краіны з незвычайнага ракурса. На гэтай выстаўке Беларусь – на фоне Космасу, пад бяскрайнім начным небам, у абдымках зорак.

Фота: Досыць рэдкая з'ява - серабрыстыя аблокі. Возера Недрава (Браслаўскія азёры)


Фота: Заход Венеры падчас невялікага палярнага ззяння (в. Вязынь, Вілейскае водасховішча)

«Часам дастаткова хаця б раз убачыць сапраўднае зорнае неба, каб назаўсёды палюбіць яго. А часам дастаткова проста аднойчы убачыць сваю краіну пад зорным небам, каб яшчэ больш закахацца ў яе. Крыштальная роўнядзь Браслаўскіх азёраў, рэдкая для Беларусі з'ява - палярнае ззянне над Вілейскім водасховішчам, узыход Месяца, Венеры і Юпітэра над касцёлам у Слабодцы (Браслаўскі раён), нябесны госць - яркі метэор, які перасякае Млечны Шлях над асеннім полем Мядзельскага раёна, Млечны Шлях між старых дубоў і над мурамі старых храмаў і замкаў… Менавіта ў нашых краях можна гуляць пад слабым святлом кароткіх летніх начэй, любавацца яркімі зімовымі зоркамі, назіраць рэдкія з'явы – серабрыстыя аблокі і нават палярныя ззянні».
Віктар Малышчыц
Фота: Туманнасць Андрамеды, першая спроба аўтара сфатаграфаваць аб'ект глыбокага космасу

Аб аўтары: Віктар Малышчыц нарадзіўся ў 1985 годзе ў Рызе. З 1992 года стала жыве ў Беларусі. Ў 2007 годзе скончыў фізічны факультэт Беларускага дзяржаўнага факультэта. Працуе выкладчыкам астраноміі ў БДУ і гімназіі № 29 горада Мінска. З 2009 года яго прафесіяй стала і фатаграфія.

Фота: Туман над сажалкай у Вязынцы

Куратар выстаўкі: Навуковы супрацоўнік навукова-экспазіцыйнага аддзела МСВМ Каміла Янушкевіч
Месца: Музей сучаснага выяўленчага мастацтва (г. Мінск, пр-т Незалежнасці, 47)
Пачатак: 12 красавіка 2013 года, 18.00

Крыніца: modernartmuseum.by

абмеркаваць на форуме zнята