Міжнародны фэстываль нененеэксперыментальнага мастацтва «ДАХ» упершыню прайшоў у 2001 г. у берлінскім кунстхаўсе «ТАХЕЛЕС». З таго часу амаль кожны год гэты фэст ладзіцца то ў Мінску, то ў Берліне.
У мінулым, 2009 г., «ДАХ» узняўся на новы ўзровень развіцця, калі згуртаваў вакол сябе творчых асоб з 11 краін свету.
У гэтым годзе мы плануем правесці Дах-Жах-11 пад кодавым назовам «Цёмныя Таямнiцы Мозга» («MAGEIA CEREBRUM»).
«Людзі павінны быць удзячнымі прыродзе за тое, што яна зрабіла іх усіх рознымі. Рознымі не толькі вонкава, але по здольнасцях к успрыманню гука, свету, колеру, густу і г.д. Гэта розніца ўспрымання адных і тых жа рэчаў з’яўляецца асноўнай, якая абапіраецца на адукацыю, выхаванне, нагледжаннасць, наслуханнасць… Без разумення ўсіх гэтых умоў нельга ўцямніць такога супярэчвання ў адзнаках адной і той жа з’явы рознымі асобамі, групоўкамі ці грамадамі… Асабліва ўсё гэта тычыцца адзнакі твораў мастацтва, што і малюе агульную карціну ЎСПРЫМАННЯ. З якога боку пажадаеце падыйсці да адзнакі, такую і атрымаеце, бо ў крузе 360° не лічачы секунд! Таму і выбар аднадумцаў вельмі шырокі…»
Традыцыйна ДАХ збярэ шмат мастакоў, якія эксперыментуюць са словам, гукам, жэстам, фарбай…Экспазіцыя на працягу фестывалю зменіцца тры разы. Музыканты, лiтаратары, пэрформеры i тэатральныя суполкi будуць чаргавацца бесперапынна...
Арганiзатары-пракуратары-ахвяры Мастацтва –
Змiцер Юркевiч (Мітрыч) і Алесь Родзiн (Дзю)
